Rep. Ann Matibag, todo suporta sa pamumuno ni Gov. Sol Aragones; nangakong itataguyod ang kalusugan at edukasyon sa Laguna

Rep. Ann Matibag, todo suporta sa pamumuno ni Gov. Sol Aragones; nangakong itataguyod ang kalusugan at edukasyon sa Laguna 

Santa Cruz, Laguna — Sa panunumpa ni Gobernadora Sol Aragones, nagbigay ng taos-pusong mensahe si Congresswoman Ann Matibag ng Unang Distrito ng Laguna bilang suporta sa bagong lider ng lalawigan. 

        Pinuri ni Rep. Matibag ang malasakit ng gobernadora sa serbisyong pangkalusugan at edukasyon, at nangakong isusulong ang mga programang mag-aangat sa mga Lagunense, lalo na sa mga kabataan at nangangailangan. 

    

        Binigyang-diin ni Rep. Matibag ang kahalagahan ng pagbibigay-priyoridad sa pampublikong kalusugan at edukasyon, at binanggit ang mga programang pang-iskolar gaya ng Scholar ni Lagunanay na tumutulong sa mga estudyanteng maaaring nahihirapan sa pag-aaral ngunit may tibay ng loob at hangaring iangat ang kanilang pamilya. 

“Sa San Pedro, kailangan nating bigyang pansin hindi lang ang mga honor student, kundi pati ang masisipag na estudyanteng nangangarap ng mas magandang kinabukasan para sa kanilang pamilya,” ani Matibag. “Dapat maramdaman ng bawat estudyanteng Lagunanay na nahihirapan sa pag-aaral na — andito kami para sa kanila.” 

        Ipinahayag din niya ang paghanga kay Gobernadora Aragones sa dedikasyon nito sa serbisyo publiko. Ani Matibag, bago pa man opisyal na manungkulan, nagsimula na agad sa trabaho si Aragones at pansamantalang nag-opisina sa isang pribadong lugar sa San Pedro sa tulong ng mga lokal na opisyal. 

        Naging emosyonal si Matibag nang banggitin ang matagal na niyang adbokasiya na mapaunlad ang San Pedro District Hospital. 

        Muling tiniyak ng kongresista ang kanyang buong suporta sa pagkuha ng pondo mula sa pambansang pamahalaan para sa modernisasyon ng nasabing ospital. Ibinahagi rin niya ang pakikipag-ugnayan niya kay Pangulong Ferdinand Marcos Jr. at House Speaker Ferdinand Martin Romualdez. 

“Sabi ko kay Ate Sol, ‘Ako na ang bahala sa pondo ng San Pedro District Hospital,’” mariing pahayag ni Matibag. “Buong suporta ng national government ang hawak natin para tuluyang maisakatuparan ang pangarap na ito.” 

Ibinahagi rin ni Matibag ang isang personal na kwento. Noong 2019, sinabi umano ng kanyang asawa na si Atty. Melvin Matibag — noon ay PDP Secretary-General — na si Sol Aragones ang magiging gobernador ng Laguna. 

        “Sabi niya, ‘Si Sol ang magiging gobernador ng Laguna,’ at ngayon, natupad na ang pangitain na iyon. Ito ay hindi lamang tagumpay — ito ay tungkol sa pangarap, malasakit, at walang humpay na paglilingkod,” ani Matibag. 

        Ipinaliwanag rin ng kongresista ang mga viral na poster sa mga ospital na may mensaheng “Bawal ang masungit,” na inilunsad ng bagong gobernador. Aniya, higit pa ito sa pagpapangiti. 

        “Hindi lang ito tungkol sa ngiti,” giit ni Matibag. “Ito ay tungkol sa dignidad. Karapat-dapat na igalang at alagaan ang bawat pasyente at bawat health worker.”

        Pinuri rin niya ang mabilis at makataong estilo ng pamumuno ni Aragones. “Day one pa lang, may plano na agad. ’Yan ang tunay na liderato,” aniya.

        Sa kanyang pangakong patuloy na pakikiisa, tiniyak ni Matibag sa mga taga-Laguna na ang Unang Distrito ay kaisa ng layunin at bisyon ni Gobernadora Aragones.

        “Bilang isang ina at isang lingkod-bayan, alam ko na ang tunay na pamumuno ay nangangailangan ng malasakit, direksyon, at matitibay na kaalyado — at iyan ang hatid ni Ate Sol sa Laguna.” 

Bilang pagtatapos, nag-alay si Matibag ng mensahe ng pasasalamat at inspirasyon:

        “Mabuhay ang bawat health worker, bawat pasyente, bawat Scholar ni Lagunanay! Mabuhay ang bawat pamilyang Lagunense. Mabuhay ang ating gobernador — ang ating Sol Aragones!”