forefront: Give Them All to Jesus

 Give Them All to Jesus

Sa panahon ngayon, tila hindi nauubusan ng dahilan ang tao upang mag-alala. May mga nagdadala ng bigat ng kabiguan, may mga sugatan ng nasirang relasyon, may mga problemado sa kabuhayan at pananalapi, at mayroon ding nababalot ng pangamba tungkol sa kalusugan at kinabukasan.

Nag-iiba man ang anyo ng ating mga suliranin, iisa lamang ang katiyakan—may Diyos na hindi nagbabago noon, ngayon, at magpakailanman.

Kaya naman napakahalaga na lagi tayong lumalapit sa Kanya at sumisilong sa Kanyang pag-aaruga. Anuman ang ating pinagdaraanan—pisikal, emosyonal, o espirituwal—maaari tayong manatiling matatag dahil nakasandig tayo sa matibay na batong hindi natitinag.

1 Peter 5:7 "Cast all your anxiety on him because he cares for you”. Ito ang simpleng paalala na hanggang ngayon ay nagbibigay ng pag-asa sa maraming mananampalataya. Ibigay sa Kanya ang lahat ng alalahanin, takot, at pasaning bumabagabag sa ating isipan at puso.

Marahil ito ang isa sa pinakamahalagang ministeryo ni Jesus—ang magbigay ng kapahingahan. Kapag sinasabi nating si Jesus ay tagapagligtas, hindi lamang ito nangangahulugan ng kaligtasan mula sa kapahamakan, kundi maging kaligtasan mula sa impiyerno ng pag-aalala, takot, pangamba, at kawalan ng kapayapaan.

Ang mundo ay puno ng dahilan upang mabahala, ngunit si Jesus ay nag-aalok ng kapayapaan at kapanatagan.

Paano natin ito maisasabuhay?

Una, ituon natin ang ating isip kay Jesus—sa Kanyang kabutihan, pagmamahal, at habag. Marami tayong maaaring isipin araw-araw, ngunit ang ating iniisip ang siyang may malaking epekto sa ating emosyon, kalusugan, at pananaw sa buhay.

Kapag ang isip ay laging nakatuon sa takot at problema, apektado maging ang ating katawan. Ngunit kapag ang puso ay puno ng pag-asa at pananampalataya, lumalakas ang ating loob at nagiging matatag tayo sa gitna ng pagsubok.

Hindi maikakaila na mahalaga rin ang pag-aalaga sa ating sarili. Ang sapat na pahinga, maayos na tulog, masustansyang pagkain, at positibong pananaw ay may malaking ambag sa ating kalusugan at resistensya.

Totoo ang kasabihang "laughter is the best medicine." Ang masayang puso at payapang isip ay nakatutulong hindi lamang sa ating damdamin kundi maging sa ating pangangatawan.

Hindi sinasabi ni Jesus na mawawala ang mga problema sa ating buhay. 

Sa gitna ng unos, may kapayapaan. Sa gitna ng pangamba, may pag-asa. At sa gitna ng mga alalahanin ng buhay, may Diyos na handang tumanggap ng lahat ng ating pasanin.

Kaya sa bawat takot, sa bawat luha, at sa bawat gabi ng pag-aalala, alalahanin natin ang simpleng pahayag na ito: “Give them all to Jesus”.