CARD MBA, nagsagawa ng global seminar para patatagin ang proteksyong pinansyal ng mga nangangailangang komunidad

 CARD MBA, nagsagawa ng global seminar para patatagin ang proteksyong pinansyal ng mga nangangailangang komunidad

sina CARD MRI Founder at Chair Emeritus Dr. Jaime Aristotle B. Alip (una mula sa kaliwa) at CARD MBA CEO Jocelyn Dequito (ikaapat mula sa kaliwa) kasama ang iba pang mga pioneer microinsurance leaders habang nagaganap ang isang panel discussion sa Mutual Microinsurance Network Seminar. 

Pinangunahan ng CARD Mutual Benefit Association (CARD MBA) ang kauna-unahang Mutual Microinsurance Network Seminar sa pakikipagtulungan sa International Cooperative and Mutual Insurance Federation (ICMIF) Foundation mula Hunyo 17 hanggang 19, 2026 sa AIM Conference Center sa Lungsod ng Makati upang patatagin ang kolaborasyong nakalaan sa pagprotekta sa mga pamilyang may mababang kita.

Nakasentro sa temang Replicating Success Globally: Scaling the Mutual Microinsurance Model for the Poorest, ang tatlong-araw na seminar ay nagsilbing plataporma ng pagtutulungan para sa mga kalahok upang magbahagi ng kaalaman at karanasan sa pagbuo ng mga programang microinsurance na madaling palawakin at may malaking epekto sa lipunan. Nagbigay-daan din ito sa mga kalahok na tugunan ang mga kasalukuyang hamon sa industriya, tuklasin ang mga umuusbong na inobasyon, at tukuyin ang kinakailangang suportang pinansyal at teknikal.

Kinikilala natin na ang mga hamon na kinahaharap ng mga mahihirap na komunidad ay masyadong malaki para lutasin ng isang institusyon lamang, ani Dr. Jaime Aristotle B. Alip, ang Founder at Chair Emeritus ng CARD MRI. Sa pamamagitan ng mga kasunduan at pagbabahagi ng kaalaman, maaari nating gayahin ang mga matagumpay na modelo at lumikha ng mas malakas at mas inklusibong network ng microinsurance.

Ang unang araw ng seminar ay nakatuon sa pagsusuri ng kasalukuyang estado ng microinsurance sa pamamagitan ng pagbibigay-diin sa mga talakayan tungkol sa mga hamon, mga oportunidad, at mga matagumpay na modelo ng sektor mula sa iba’t ibang bansa. 

Sa ikalawang araw, ibinahagi ng CARD MBA ang naging paglalakbay nito mula sa pagiging mutual fund tungo sa pagiging mutual microinsurance provider. Ipinakita ang istruktura ng pamamahala ng organisasyon, ang sistema ng pag-aayos ng claim na pinatatakbo ng teknolohiya, ang modelo ng distribusyon sa pamamagitan ng CARD MRI Financial Institutions, at mga estratehiya upang mapalaki ang pakikilahok ng mga miyembro sa pagmamay-ari at paggawa ng desisyon.

Kaugnay ng mga tagumpay na ito, isinaad ni CARD MBA CEO Jocelyn Dequito, Ang mutual microinsurance ay umuusbong sa tiwala, hindi lamang sa pagitan ng mga institusyon at ng kanilang mga miyembro, kundi maging sa mga organisasyong nagtutulungan para sa iisang layunin na protektahan ang mga komunidad na may mababang kita.

Nakiisa si Dr. Alip sa mga kapwa niyang pioneer sa microinsurance sa isang panel discussion tungkol sa mga pangunahing salik ng tagumpay ng mga programa sa mutual microinsurance. 

Sa huling araw ay bumisita sila sa Lungsod ng San Pablo, Laguna, kung saan naobserbahan ng mga kalahok ang center meeting ng CARD Bank sa Brgy. San Gabriel. Nakapanayam din nila ang center officers, personal na nakita kung paano naghahatid ng mga serbisyo ng insurance ang CARD MBA at ang mahusay na komunikasyon nito sa mga miyembro.

Sinalihan ang seminar ng 101 practitioner at pinuno ng microinsurance mula sa Pilipinas at iba’t ibang bansa kabilang ang United Kingdom, Myanmar, India, Kenya, Hong Kong, Indonesia, Malawi, Mozambique, Paraguay, Thailand, at Timor-Leste.

Sa pamamagitan ng seminar, binigyang-diin ng CARD MBA at ng ICMIF Foundation ang halaga ng kolaborasyon at pagtitiwala upang mas maging inklusibo ang proteksyong pinansyal at makabuo ng economic safety net para sa mga komunidad na may mababang kita sa buong mundo.(Jireh Pearl Casionan)