Mayor Jan Garcia, Nakiisa sa 23rd Cerebral Palsy Awareness and Protection Week

 Mayor Jan Garcia, Nakiisa sa 23rd Cerebral Palsy Awareness and Protection Week

Pagsanjan, Laguna-Nakikiisa si Mayor Januario Ferry “Jan” Garcia sa pagdiriwang ng 23rd Cerebral Palsy Awareness and Protection Week na ginaganap mula Setyembre 16 hanggang 22, 2026, bilang bahagi ng pagsusulong ng kamalayan, pag-unawa, proteksiyon at pantay na oportunidad para sa mga taong may cerebral palsy.

May temang “One Shared Voice, One Collective Choice: Advocacy ? Empowerment,” binibigyang-diin ng pagdiriwang ngayong taon ang kahalagahan ng pakikinig sa tinig ng mga taong may cerebral palsy at ng sama-samang pagkilos upang maisulong ang isang inklusibong pamayanan.

Ayon sa mensahe ng alkalde, hindi dapat maging hadlang ang cerebral palsy sa pangarap, pakikilahok, paglilingkod at pagkamit ng buong potensiyal ng isang tao. Mahalaga aniya ang pagkakaroon ng sapat na suporta, pantay na oportunidad at pamayanang may pag-unawa at pagtanggap.

Binigyang-diin din ang kahalagahan ng paggalang sa karapatan, pagkakapantay-pantay, accessibility at inklusibong pakikilahok ng mga taong may kapansanan sa iba't ibang larangan ng lipunan.

Bukod sa adbokasiya para sa mga taong may cerebral palsy, ibinahagi rin ang personal na karanasan nina Mayor Jan at Mayora Aesa Garcia bilang licensed foster parents sa loob ng 10 taon. Bilang foster parents ng isang batang may cerebral palsy, binuksan umano ng mag-asawa ang kanilang tahanan at puso sa mga batang kanilang inaruga at itinuring na bahagi ng kanilang pamilya.

Kaugnay nito, muling binigyang-diin ni Mayor Jan ang kahalagahan ng pagtanggap at pagmamahal sa isang pamilya.

Sa kanyang talumpati noong Adoption and Alternative Child Care Week (AACCW) 2026, sinabi niya na hindi kailangang magkapareho ang pinagmulan ng mga tao upang maging isang pamilya at hindi rin kailangang magkadugo upang magmahalan.

“Hindi kailangang magkapareho ang pinagmulan upang maging pamilya. Hindi kailangang magkadugo upang magmahalan.”

Binigyang-diin din ng alkalde na ang isang tahanang handang tumanggap at kumalinga, kasama ang mga taong handang magmahal, ay maaaring maging simula ng isang tunay na pamilya.

Sa paggunita sa 23rd Cerebral Palsy Awareness and Protection Week, muling nanawagan ang mga tagapagtaguyod para sa patuloy na paggalang sa karapatan, pag-aalis ng diskriminasyon at pagbibigay ng pantay na pagkakataon sa mga taong may cerebral palsy at iba pang persons with disabilities.

Layunin ng pagdiriwang na mapalawak ang kamalayan ng publiko at mapalakas ang sama-samang pagkilos tungo sa isang pamayanang inklusibo at walang naiiwan.(Mhadz/Report mula sa FB page ni Mayor Jan Garcia)